Ffrydio data

Mae’r miniSMU MS01 yn cefnogi ffrydio data parhaus er mwyn monitro a chofnodi mesuriadau foltedd a cherrynt mewn amser real. Mae’r adran hon yn esbonio sut i osod a defnyddio ffrydio data ar gyfer eich cymwysiadau.

Deall ffrydio data

Mae ffrydio data yn gadael i’ch miniSMU MS01 anfon data mesur parhaus i’ch cyfrifiadur ar gyfradd benodol. Yn wahanol i fesuriadau unigol sy’n gofyn am orchmynion ar wahân, mae ffrydio’n rhoi’r canlynol i chi:

Caffael data parhaus heb orbenion gorchmynion
Mesuriadau wedi’u hamseru’n fanwl gywir ar gyfyngau rheolaidd
Dal digwyddiadau byrhoedlog yn effeithlon

Galluoedd ffrydio data

Nodwedd	Manyleb	Nodiadau
Cyfradd samplu uchaf	1,000 sampl yr eiliad	Wrth weithredu ar un sianel
Paramedrau mesur	Foltedd a cherrynt	Caiff y ddau werth eu hadrodd
Cydraniad y stamp amser	1ms	Mae stamp amser gyda phob sampl

ℹ

Ffrydio ar ddwy sianel: Wrth ffrydio data o’r ddwy sianel ar yr un pryd, caiff cyfanswm y gyfradd samplu ei rannu rhyngddynt. Er enghraifft, bydd pob sianel yn ffrydio ar oddeutu 300 sampl yr eiliad (600Hz i gyd), ond nid ar 600 sampl yr eiliad (1,200Hz i gyd).

ℹ

Blaenoriaeth sianeli: Pan fydd y ddwy sianel yn ffrydio, mae gan y sianel a gafodd ei rhoi ar waith gyntaf flaenoriaeth fesur dros y sianel a gafodd ei rhoi ar waith wedyn. Os caiff mesuriadau eu trefnu ar yr un pryd, mae’r sianel a gafodd ei rhoi ar waith gyntaf yn mesur yn gyntaf, a gall hynny achosi amrywiadau bach yn amseriad pwyntiau data’r sianel a gafodd ei rhoi ar waith yn ail.

Galluogi ffrydio data

I alluogi ffrydio data ar gyfer sianel benodol, defnyddiwch y gorchymyn SOURx:DATA:STREAM ON, lle mae x yn rhif y sianel (1 neu 2):

SOURx:DATA:STREAM ON

Enghraifft:

SOUR1:DATA:STREAM ON

Mae hyn yn galluogi ffrydio data ar gyfer sianel 1.

I analluogi ffrydio data:

SOURx:DATA:STREAM OFF

Enghraifft:

SOUR1:DATA:STREAM OFF

Mae hyn yn analluogi ffrydio data ar gyfer sianel 1.

Gosod y gyfradd samplu

Mae’r gyfradd samplu yn pennu faint o fesuriadau sy’n cael eu gwneud bob eiliad wrth ffrydio.

I osod y gyfradd samplu ar gyfer sianel benodol, defnyddiwch y gorchymyn SOURx:DATA:SRATE:

SOURx:DATA:SRATE

Enghraifft:

SOUR1:DATA:SRATE 500

Mae hyn yn gosod y gyfradd samplu i 500 sampl yr eiliad ar gyfer sianel 1.

Nodiadau:

Os gosodwch gyfradd uwch na 750 sampl yr eiliad, bydd yn mynd yn ôl i’r uchafswm, sef 750
Mae cyfraddau samplu is fel arfer yn rhoi mesuriadau mwy manwl gywir. Caiff y gyfradd gorsamplu ei haddasu’n awtomatig i weddu i’r gyfradd samplu y gofynnwyd amdani
Gall cysylltiadau Wi-Fi gyfyngu ar y gyfradd samplu uchaf sy’n ymarferol

Fformatau ffrydio data

Caiff data ei anfon mewn sypiau o sawl mesuriad, mewn fformat CSV â’r strwythur canlynol:

1,1751317508035,-4.990e-01,-3.870e-05,2

1,1751317508127,-4.987e-01,-3.910e-05,2

1,1751317508727,-4.977e-01,-3.911e-05,2

Meysydd y fformat data

Maes	Enghraifft	Disgrifiad
Rhif y sianel	`1`	Sianel y miniSMU (1 neu 2)
Stamp amser UNIX	`1751317507935`	Stamp amser y mesuriad mewn milieiliadau
Foltedd	`-4.990e-01`	Mesuriad foltedd mewn foltiau (-0.499 V)
Cerrynt	`-3.910e-05`	Mesuriad cerrynt mewn amperau (-39.1 μA)
Amrediad	`2`	Dynodydd yr amrediad cerrynt (ar gyfer dadfygio yn unig)

Perfformiad ffrydio: pethau i’w hystyried

Ffrydio drwy USB

Mae’n rhoi’r ffrydio cyflym mwyaf dibynadwy
Ychydig iawn o golli data neu jitter amseru
Mae’n cefnogi’r gyfradd lawn o 750 sampl yr eiliad
Mae angen cysylltiad corfforol â’r cyfrifiadur

Ffrydio drwy Wi-Fi

Mae’n cynnig hwylustod diwifr
Efallai y bydd rhai pecynnau’n cael eu colli o bryd i’w gilydd
Ystyriwch ddefnyddio 100-300 sampl yr eiliad i gael mwy o ddibynadwyedd
Gall tagfeydd ar y rhwydwaith effeithio ar y perfformiad
Mae’r pellter o’r pwynt mynediad yn effeithio ar y dibynadwyedd

Perfformiad y cyfrifiadur

Gall diweddaru’r graffiau effeithio ar y perfformiad ar gyfrifiaduron arafach
Ystyriwch leihau cyfradd diweddaru’r graffiau er mwyn i bopeth redeg yn llyfnach
Mae storfa SSD yn rhoi perfformiad gwell ar gyfer cofnodi cyflym
Caewch raglenni eraill sy’n defnyddio llawer o adnoddau yn ystod ffrydio hollbwysig

Cymwysiadau enghreifftiol

Cromlin ddadwefru batri

SOUR1:CURR -0.1       # Set 100mA discharge current
SOUR1:VOLT:PROT 2.5   # Set low voltage cutoff at 2.5V
SOUR1:FIMV ENA        # Force current mode
SOUR1:DATA:SRATE 10   # 10 samples per second is sufficient
SOUR1:DATA:STREAM ON  # Begin streaming
OUTP1 ON              # Start the discharge

Ymateb IV cell solar o dan olau sy’n amrywio

SOUR1:CURR:PROT 0.05  # Limit to 50mA
SOUR1:FVMI ENA        # Voltage source mode
SOUR1:DATA:SRATE 100  # 100 samples per second
SOUR1:DATA:STREAM ON  # Begin streaming
OUTP1 ON              # Enable output